停課期間,全部真人配音粵文故事書八折,快啲買畀小朋友睇啦!

了解多啲
廣東話拼音系統,耶魯粵語拼音同粵拼嘅分別

到底耶魯粵語拼音同粵拼有咩分別呢?

由於冇政府嘅支持,廣東話一直都冇一套統一嘅拼音系統,百花齊放。喺幾種廣東話拼音系統入面,耶魯粵語拼音(Yale romanization of Cantonese)香港語言學學會粵語拼音方案(粵拼)係依家嘅主流。

噉到底我哋應該學粵拼定耶魯粵語拼音呢?邊一個系統會好用啲,邊一個系統會詳細啲呢?喺呢一篇文,我哋會同大家比較吓粵拼同耶魯粵語拼音。

粵拼同耶魯粵語拼音嘅歷史

耶魯粵語拼音嘅歷史長過粵拼好多。耶魯粵語拼音喺1952年由 Gerard P. Kok 同黃伯飛創造,1958年正式推出。耶魯粵語拼音係四種由耶魯大學創造嘅東亞語言拼音系統嘅其中一種。

而粵拼就係喺1993年由香港語言學學會(LSHK)推出。

粵拼同耶魯粵語拼音有咩分別?

粵拼同耶魯粵語拼音非常相似,除咗標音方法,只係得19%嘅聲母同韻母有唔同。值得留意嘅係,粵拼可以表達倒嘅韻母比耶魯粵語拼音更加齊全。如果你一開頭揀咗學耶魯粵語拼音,去到後期你可能要學翻粵拼,先可以用拼音表達所有廣東話字嘅發音。

粵拼同耶魯粵語拼音標聲方法嘅比較

 粵拼耶魯粵語拼音
第一聲e1ē
第二聲e2é
第三聲e3e
第四聲e4èh
第五聲e5éh
第六聲e6eh

粵拼同耶魯粵語拼音嘅聲母嘅比較

粵拼耶魯粵語拼音
zj
cch
jy

粵拼同耶魯粵語拼音嘅韻母嘅比較

粵拼耶魯粵語拼音
oeeu
oengeung
oekeuk
eoieui
eoneun
eoteut
eu/
em/
en/
ep/
et/

粵拼同耶魯粵語拼音邊個好用啲啊?

喺呢方面粵拼贏耶魯粵語拼音九條街。如果要打拼音出嚟,因為粵拼標音嘅方法係用數字,所以只要用普通嘅鍵盤,無論喺電話定電腦都可以輸入倒啲拼音。另一方面,耶魯粵語拼音係用符號標音嘅。呢啲符號用普通鍵盤根本打唔到,要用專門打拼音嘅鍵盤先打倒,非常之唔方便。

如果要用拼音打中文字,無論喺邊一個平台,支援粵拼嘅輸入法都多過耶魯粵語拼音。

粵拼同耶魯粵語拼音邊個流行啲啊?

經過二十幾年嘅推廣,其實粵拼已經成為咗廣東話拼音系統嘅主流。我哋之前喺Facebook做咗個調查,雖然票數唔多,但大家都可以參考吓。

新版耶魯粵語拼音(1994)同正統耶魯粵語拼音有咩分別呢?

耶魯粵語拼音喺1994年更新咗一次,稱為新版耶魯粵語拼音。呢個版本嘅耶魯粵語拼音冇增加到任何聲母同韻母,只係改咗標聲方法,同粵拼一樣用數字標聲。

粵拼同新版耶魯粵語拼音標聲方法嘅比較

 粵拼新版耶魯粵語拼音
第一聲e1e1
第二聲e2e2
第三聲e3e3
第四聲e4e4
第五聲e5e5
第六聲e6e6

雖然新版耶魯粵語拼音改善咗本身嘅標聲問題,但因為冇增加到其他粵拼有嘅韻母,所以我哋都係會推薦大家用粵拼。

粵拼同新版耶魯粵語拼音元音嘅比較

粵拼新版耶魯粵語拼音
aaa
oeeu
oengeung
oekeuk
eoieui
eoneun
eoteut
eu/
em/
en/
ep/
et/

FAQs

粵拼同耶魯粵語拼音邊個歷史耐啲?

耶魯粵語拼音嘅歷史長過粵拼好多。耶魯粵語拼音喺1952年由 Gerard P. Kok 同黃伯飛創造,1958年正式推出;粵拼就喺1993年由香港語言學學會(LSHK)推出。

粵拼同耶魯粵語拼音邊個流行啲啊?

經過二十幾年嘅推廣,其實粵拼已經成為咗廣東話拼音系統嘅主流。

粵拼同耶魯粵語拼音邊個好用啲啊?

粵拼好用過耶魯粵語拼音九條街。因為粵拼標音嘅方法係用數字,所以只要用普通嘅鍵盤,無論喺電話定電腦都可以輸入倒啲拼音;耶魯粵語拼音係用符號標音嘅,用普通鍵盤根本打唔到,所以非常之唔方便。

新版耶魯粵語拼音(1994)同正統耶魯粵語拼音有咩分別呢?

耶魯粵語拼音喺1994年更新咗一次,稱為新版耶魯粵語拼音。呢個版本嘅耶魯粵語拼音冇增加到任何聲母同韻母,只係改咗標聲方法,同粵拼一樣用數字標聲。

粵拼同耶魯粵語拼音有咩分別啊?

粵拼同耶魯粵語拼音唔同嘅地方係標音方法同包含嘅聲母同韻母,粵拼包含嘅聲母同韻母多過耶魯粵語拼音。

結論

雖然學呢兩個粵語拼音系統,都好過完全唔學,但係粵拼又詳細啲,又好用啲,重有有咩理由要學耶魯呢?

好多謝你睇晒我哋呢篇比較耶魯粵話拼音同粵拼嘅文啊。睇完呢篇文之後,想開始學粵拼?即刻睇吓我哋有發音圖表、錄音同文字描述嘅廣東話拼音教學啦

    留言

    留言唔會公開你嘅電郵地址。

    English粵文中文 (台灣)日本語