停課期間,全部真人配音粵文故事書八折,快啲買畀小朋友睇啦!

了解多啲
用國際音標學粵拼

用國際音標學粵拼

國際音標(International Phonetic Alphabet)係套國際通用嘅標音系統,用嚟幫唔同嘅語言標音。

因為國際音標收錄咗唔同語言嘅元音同輔音,而且佢係用特別嘅字母嚟標音,要普通人攞國際音標當拼音系統嚟用係件好亂、好難同好唔方便嘅事。

粵拼就係爲咗解決呢個問題而創立嘅系統,佢以國際音標做基礎,搦走同粵語發音方法冇關嘅元音同輔音,再用英文字母同數字標音,喺日常生活應用呢個系統嘅一定容易好多。

因爲粵拼係基於國際音標而創立嘅系統,如果你睇完我哋篇粵拼教學有嘢唔明,喺國際音標就會搵倒答案,所以呢篇文我哋就會教你國際音標系統嘅基本知識,幫你學好啲粵拼。

國際音標嘅元音

國際音標會用模仿人類口腔構造嘅模型(面向左,左邊係嘴唇,右邊係喉嚨)去表達元音嘅發音方法,呢個模型嘅可以表達元音三個發音嘅特徵:

  • 元音高度
  • 元音脷位
  • 元音圓唇度

元音高度(Vowel height)指條脷同上顎之間嘅距離;元音深度(Vowel backness)指條脷喺嘴唇同喉嚨中間嘅位置;元音圓唇度(Vowel roundness)就係指發音時嘴唇向內或者向外翻嘅程度。

以下嘅模型用國際音標標記咗全部廣東話嘅單元音。因爲呢個模型係根據真實嘅研究資料畫出嚟,所以會有元音中心化嘅現象(即係前後嘅元音都會偏向喺中間發音),同理論唔同。

廣東話國際音標元音表
呢個模型入面藍色嘅係需要圓唇嘅單元音。

例如單元音 a 嘅元音高度係開、元音脷位係前、元音圓唇度係非圓唇,所以佢就喺呢個模型嘅左下角。發呢個音嘅時候,就應該盡量擘大個嘴,將條脷盡量伸前,放鬆嘴唇唔好捲起。

將呢個模型嘅元音轉做粵拼嘅元音,個模型就會變成噉樣:

廣東話國際音標元音表,粵拼版
有*號標記嘅,喺粵拼都冇獨立標記做單元音。

除咗可以知道唔同元音嘅發音方法,噉樣對比之下,你就會發現有啲單元音粵拼冇將佢哋獨立標記出嚟,理由係呢啲音通常只會做粵拼複元音(Diphthong)嘅一部份,唔會單獨發音,而且佢哋喺國際音標嘅標記係英文字母(除咗ɵ之外),同其他粵拼嘅單元音有重複。

例如粵拼嘅複元音 ei ,其實就係由國際音標嘅單元音 e (即係第二個模型嘅e*)同粵拼嘅單元音 i 組成。

如果你當佢係由粵拼嘅單元音 e 同 i 組成,你就唔會發得啱個音。

廣東話拼音、粵拼教學 ei 發音側面圖

國際音標嘅輔音

國際音標會用表格去表達唔同輔音嘅發音特徵,包括輔音嘅發音方法同發音嘅地方。

以下嘅模型用國際音標標記咗全部廣東話嘅輔音:

雙唇唇齒齒齦齦後捲脷硬齶軟齶唇軟齶脷後聲門
塞音p pʰt tʰk kʰkw kʰw 
鼻音mnŋ
顫音
閃音
擦音fsh
塞擦音tstsʰ
邊擦音
近音jw
邊音l
廣東話輔音表,國際音標版

將呢個表轉做粵拼:

雙唇唇齒齒齦齦後捲脷硬齶軟齶唇軟齶脷後聲門
塞音b pd tg kgw kw 
鼻音mnng
顫音
閃音
擦音fsh
塞擦音zc
邊擦音
近音jw
邊音l
廣東話輔音表,粵拼版

呢個表每欄代表一個發音地方,而每行就代表一個發音方法。

有個好重要嘅規則係,發音地方嘅排序係由左至右,列出由嘴唇到喉嚨嘅發音地方。

用呢個表,我哋就可以好易噉分清楚唔同輔音嘅發音特徵,之後要仔細查落去都容易啲。以下舉兩個香港人成日都分唔倒嘅輔音做例子:

粵拼輔音 n 同 ng 嘅分別

輔音 n 同 ng 嘅發音方法一樣都係鼻音,分別係輔音 n 係喺口腔嘅前半部份(齒齦)發音,而輔音 ng 係喺口腔嘅後半部份(軟齶)發音。

粵拼輔音 n 同 l 嘅分別

輔音 n 同 l 嘅發音地方都係喺口腔嘅前半部份(齒齦),分別係輔音 n 嘅發音方法係鼻音,而輔音 l 嘅發音方法係邊音。

FAQs

點解學國際音標可以幫我學粵拼?

因爲國際音標(International Phonetic Alphabet)係套國際通用、用嚟幫唔同語言標音嘅標音系統,而粵拼係基於國際音標而創立嘅系統,如果你對粵拼某啲元音或者輔音有疑問,喺國際音標就會搵倒答案。

如果係噉,點解我唔可以只係學國際音標?

因為國際音標收錄咗唔同語言嘅元音同輔音,而且佢係用拉丁字母嚟標音,要係日常生活攞國際音標當拼音系統嚟用係件好亂、好難同好唔方便嘅事。

粵拼嘅輔音 n 同 ng 有咩分別?

輔音 n 同 ng 嘅發音方法一樣都係鼻音,分別係輔音 n 係喺口腔嘅前半部份(齒齦)發音,而輔音 ng 係喺口腔嘅後半部份(軟齶)發音。

粵拼嘅輔音 n 同 l 有咩分別?

輔音 n 同 l 嘅發音地方都係喺口腔嘅前半部份(齒齦),分別係輔音 n 嘅發音方法係鼻音,而輔音 l 嘅發音方法係邊音。

參考資料

Handbook of the International Phonetic Association: A guide to the use of the international phonetic alphabet. (2014). Cambridge: Univ. Press.

Cantonese phonemic inventory [PDF]. (n.d.). American Speech-Language-Hearing Association.

    留言

    留言唔會公開你嘅電郵地址。

    English粵文中文 (台灣)