由細到大，我哋聽過無數次懶音呢個問題，但到底點解我哋要改善懶音呢？
喺呢篇文章，我哋就會話你知三個你應該改善懶音嘅原因，等你快啲扚起心肝學粵拼，糾正懶音。
懶音會令其他人難啲聽清楚我哋講咩
有時就算我哋講嘢唔清楚，語境都可以幫我哋傳達我哋本身想表達嘅意思。
但如果我哋係唱𡁵歌，做𡁵電台節目，語境就好難幫我哋，發音準確就好緊要。
香港人一般都會撈亂 n 同 l、n 同 ng、g 同 gw、k 同 kw呢幾組輔音，當呢幾組音入面嘅音一樣，然後每組音入面只係發 l 音、n 音、g 音、k 音。
粤文普遍都係一音多字，少咗4個輔音，講嘢嘅變化少咗，其他人要聽清楚你講咩就難咗。
懶音會影響我哋學外語
就算我哋有懶音，其他香港人都會明我哋講𡁵咩，但問題係我哋會將錯嘅發音習慣同對呢幾組輔音嘅理解帶落其他外語入面。
如果嗰啲外語都會用呢幾組音，我哋就好大機會發錯晒啲音。
以英文做例子，如果我哋唔識分輔音 n 同 l 嘅分別，就會將呢句句子
I need to leave now.
讀成：
I leed to leave low.
又以韓文做例子，如果我哋唔識分輔音 n 同 ng 嘅分別，就會將呢句句子
나는 너를 사랑해.（我愛你）
讀成：
나는 너를 사란해.
雖然發音只係學外語嘅一部份，但如果你可以分辨倒唔同輔音，你記生字同適應呢種語言嘅速度一定會快好多。
懶音會傳畀下一代
出世冇耐、未識講嘢嘅細路仔會透過聽其他人同佢講嘢而學識一種語言，佢哋唔需要學文法，亦都唔使學粵拼。
如果父母本身講嘢有懶音，個細路仔就好自然會繼承咗呢種發音方式，再繼承埋上面講嘅兩個問題。雖然佢之後有大把機會可以學翻好，但一開頭教好佢唔係最簡單咩？
就算個細路仔之後喺其他地方吸收咗懶音，只要父母識粵拼同識分懶音，佢哋都可以糾正個小朋友。